حوزہ نیوز ایجنسی کی رپورٹ کے مطابق، حجت الاسلام والمسلمین نظری منفرد نے دفتر مرحوم حضرت آیت الله فاضل لنکرانی کے حسینیہ میں منعقدہ عشرہ محرم کی مجلس عزا سے خطاب کے دوران کہا: صحیح عقائد اور مضبوط دینی نظریہ انسان کو گناہوں، انحرافات اور سماجی مفاسد سے محفوظ رکھنے میں بنیادی کردار ادا کرتے ہیں جبکہ معاشرے کے موجودہ مسائل کی ایک اہم وجہ آخرت، حساب و کتاب اور قیامت پر اعتقاد کا کمزور ہونا ہے۔
انہوں نے کہا: انسان کے اعمال کا سرچشمہ اس کے عقائد اور افکار ہوتے ہیں۔ اگر کسی شخص کا ایمان خدا، قیامت، جزا و سزا اور الٰہی نگرانی پر مضبوط ہو تو وہ برائیوں اور گناہوں سے دور رہنے کی کوشش کرتا ہے لیکن جب یہ اعتقادات کمزور پڑ جائیں تو اخلاقی اور سماجی انحرافات بڑھنے لگتے ہیں۔
حجت الاسلام نظری منفرد نے کہا: آج معاشرے میں پائے جانے والے بہت سے اخلاقی اور سماجی مسائل کی جڑ آخرت پر یقین کی کمزوری ہے۔ اگر انسان اس حقیقت پر یقین رکھے کہ اسے اپنے تمام اعمال کا حساب دینا ہے تو وہ دوسروں کے حقوق پامال کرنے، ظلم، خیانت اور دیگر برائیوں سے اجتناب کرے گا۔
اس دینی ماہر کے مطابق دین صرف چند عبادات کا مجموعہ نہیں بلکہ عقائد، اخلاق اور عملی احکام کا ایک مکمل نظام ہے جو انسان کی فکر، انگیزہ اور رویّوں کی اصلاح کرتا ہے۔ جب صحیح اعتقادات معاشرے میں مضبوط ہوں تو فرد اور معاشرہ دونوں اصلاح کی طرف بڑھتے ہیں۔
انہوں نے مزید کہا: والدین، اساتذہ، علماء اور تربیتی اداروں کی ذمہ داری ہے کہ وہ نوجوان نسل میں خدا شناسی، معاد اور دینی اقدار کے بارے میں آگاہی پیدا کریں کیونکہ دینی باور اور معنویت ہی معاشرتی امن، اخلاقی استحکام اور سماجی مفاسد کی روک تھام کا مؤثر ذریعہ ہیں۔
آپ کا تبصرہ